პოლონეთში ოფიციალური ვიზიტით მყოფმა საქართველოს პრეზიდენტმა მიხეილ სააკაშვილმა დიდი ქართველი მსახიობისა და ღვაწლმოსილი საზოგადო მოღვაწის სოფიკო ჭიაურელის გარდაცვალების გამო მწუხარება გამოთქვა და განაცხადა:

"სოფიკო ჭიაურელი არამარტო ბრწყინვალე მსახიობი, არამედ დიდი ქართული ოჯახის წარმომადგენელი, ძალიან მნიშვნელოვანი საზოგადო მოღვაწე და უბრალოდ კარგი ადამიანი იყო. სამძიმარს ვუცხადებ მის ოჯახს, ახლობლებს და მსურს აღვნიშნო, რომ ეს დიდი დანაკარგია ქართული კულტურისათვის, ქართული საზოგადოებრიობისათვის და მთლიანად საქართველოსათვის. მე შევქმენი სახელმწიფო კომისია, რომელსაც სათავეში, ჩემი თხოვნით, ნინო ბურჯანაძე ჩაუდგება. ეს კომისია სოფიკო ჭიაურელის დაკრძალვის ორგანიზებას უზრუნველყოფს, რათა ამ ძალზე მნიშვნელოვანი ქართველის ღვაწლი საზოგადოების წინაშე, სათანადოდ აღინიშნოს".

საქართველოს პრეზიდენტის
ადმინისტრაციის პრესსამსახური