საქართველოს პრეზიდენტი მიხეილ სააკაშვილი საერთო ეროვნული გამოცდების სამზადისით დაინტერესდა და დღეს განათლების მინისტრს კახა ლომაიას შეხვდა. მიხილ სააკაშვილმა კახა ლომაიას რეგისტრაციის ვადის 2-3 დღით გადაწევა დაავალა, რადგან მსურველთა რაოდენობა ნავარაუდევზე გაცილებით მეტი აღმოჩნდა. პრეზიდენტის განცხადებით, საგამოცდო ტესტებთან დაკავშირებული აჟიოტაჟი და ნერვიულობა სრულიად უადგილოა, რადგან მათი შევსება მესამე კლასელ ბავშვსაც შეუძლია. "თუკი 9 წლის ბავშვი ტესტს წარმატებით ასრულებს, ეს 17 წლისამაც უნდა შეძლოს, თუმცა საამისოდ რაღაც მაინც უნდა იცოდეს. საქართველოში პროტექციის, ჩაწყობისა და უცოდინრობის ხანა უნდა დასრულდეს", - აღნიშნა პრეზიდენტმა.

მიხილ სააკაშვილმა ყურადღება იმაზეც გაამახვილა, რომ აბიტურიენტები კონფლიქტის ზონებიდანაც უნდა ჩამოვიდნენ, თუმცა შეფასების კრიტერიუმები ყველასთვის ერთნაირი იქნება.

საქართველოს პრეზიდენტის
ადმინისტრაციის მასმედიასთან და
საზოგადოებასთან ურთიერთობის სამსახური