ცენტრალური საარჩევნო კომისიის თავმჯდომარისა და ცესკო-ს ერთი წევრის ღია კონკურსის შედეგებთან დაკავშირებით საქართველოს პრეზიდეტის ადმინისტრაციის უფროსის მოადგილემ მიხეილ ნინუამ ბრიფინგი გამართა. კერძოდ მან განაცხადა, რომ 1 ოქტომბერს გაიმართა საკონკურსო კომისიის სხდომა (კომისია საქართველოს პრეზიდენტის 7 სექტემბრის განკარგულებით შედგა), რომელზეც კომისიის წევრებმა ღია კონკურსის შედეგად ამ თანამდებობების დასაკავებლად შეარჩიეს თავმჯდომარეობის ორი კანდიდატი - ლევან თარხნიშვილი და გიორგი გვაჯაია, ხოლო ცესკო-ს წევრობის სამი კანდიდატი - დავით ზაალიშვილი, დავით კირთაძე და პაატა მანჯგალაძე.

როგორც მიხეილ ნინუამ განაცხადა, საქართველოს პრეზიდენტმა პარლამენტს შვიდი დღის ვადაში უნდა წარუდგინოს ცესკო-ს თავმჯდომარის თანამდებობაზე ერთი კანდიდატურა, ხოლო წევრის თანამდებობაზე ორი კანდიდატურა.

საკონკურსო კომისია პრეზიდენტის ადმინისტრაციისა და არასამთავრობო ორგანიზაციათა წარმომადგენლებისაგან იყო დაკომპლექტებული. სულ შემოსული 12 განცხადებიდან 9 განცხადება იყო კომისიის წევრის, ხოლო 3 - თავმჯდომარის ვაკანტურ თანამდებობაზე.

საქართველოს პრეზიდენტის
ადმინისტრაციის პრესსამსახური