მიხეილ სააკაშვილმა პრეზიდენტის სასახლეში დღეს ამერიკის შეერთებული შტატების თავდაცვის მდივნის მოადგილე ბირთვული, ქიმიური და ბიოლოგიური თავდაცვის საკითხებში, ენდრიუ ვებერი, ამერიკის ვოლტერ რიდის საჯარისო კვლევითი ინსტიტუტის ხელმძღვანელი და აშშ-ს თავდაცვის დეპარტამენტის მაღალი რანგის დელეგაცია მიიღო. შეხვედრის მთავარი თემა საქართველოსა და ამერიკისა ურთიერთობისა და თანამშრომლობის გაღრმავება იყო. შეხვედრისას, კონკრეტული მიმართულებები და დარგები განიხილეს. მხარეებმა საქართველოსთვის და, ზოგადად, რეგიონისთვის ქართულ-ამერიკული საზოგადოებრივი ჯანდაცვის ცენტრალური რეფერალური ლაბორატორიის განვითარების პერსპექტივებზე იმსჯელეს. ასევე აღინიშნა, რომ ლაბორატორია უკვე შექმნილია და უახლოეს მომავალში პირველი კვლევებიც დაიწყება.

ქართულ-ამერიკული პარტნიორობის ფარგლებში, ამ ლაბორატორიაში ამერიკელი სამხედრო მკვლევარები იმუშავებენ.როგორც საუბრისას ამერიკულმა მხარემ აღნიშნა, ეს ლაბორატორია არის საზოგადოებრივი ჯანდაცვის სისტემის ერთ-ერთი მთავარი ელემენტი, რომელიც მნიშვნელოვან შედეგს მოიტანს ეპიდემიოლოგიური ზედამხედველობის, ბიოლოგიური კვლევისა და სურსათის უვნებლობის მხრივ.